11 يناير، 2011

حلمي الجديد.. مستنياك

حلم مات.. وحلم بيفكر يموت
وحلم بيشق سكته وسط الغيوم
لساك يا حلم تايه؟
لساك هناك بتبصلي؟
بتقولي فوقي م الألم
ازاي تسيبي خطوتك تطرح ندم !!

حلمي اللي تايه من سنين
لفيت هنا.. وكمان هناك
دورت بين كل الأماكن
يمكن ألاقي قلب
يريح الجرح اللي ساكن

بس النهاية مش هنا
لساك فاكرني مِسَلِّمة؟
ده انا كنت فاكراك من سنة
كنت الهنا.. وكنت المنى
وادي السنة عدت سنة
وسنين كتييييييير
وفضلت انا


ورجعت تاني من جديد
بنده عليك.. والصوت بعيد
والصوت صداه جوايا
بس..
خايف ليوصل بالسكوت
فيزيد سكوت
ويزيد أمل
يمحيه ألم

حلمي اللي تايه من زمان
كفاياك كلام
كفاياك آلام
الوقت حان
لاجل ما يطلع زهر نور وسط الظلام
يطرح بذور الحب ويا الأمل
فتزيد حياة.. وتزيد نغم
فأحلم الحلم الجديد
ويعدي حد السما
يبدأ ينور دنيتي

يمحي الأماني المظلمة

حلمي الجديد..
مستنياك..
مستنياك..
مستنياك..


إهداء إلى العام الجديد
مستنية أحلام حلوة كتير معاك
متخذلنيش
:)

4 يناير، 2011

مرحباً 2011.. يا ترى مخبيلنا ايه!!

خلصت 2010
كانت سنة عجيبة بكل المقاييس.. فرح يليه حزن يليه حلم يليه ألم
أحداث كتييييييير اوي.. كتير منها كان مؤلم.. وبعضها كان مفرح.. والباقي كان مفرح واتقلب لمؤلم
ظلمت نفسي كتيييير اوي في 2010
وزعلت من ناس كتير.. وزعلت من نفسي كتير.. وزعلت ناس مني.. يا رب يسامحوني على ده
وحطيت احلام واهداف كتير.. وسبتها ومحققتهاش.. ساعات غصب عني بس المهم انها كانت احلامي واهدافي انا.. وسبتها في الاخر
 
كنت عايزة 2010 تخلص علشان احس بأمل جديد مع سنة جديدة
وكان مسك الختام ليه يوم 31/12/2010.. لقاء المدونين في المنصورة
كان بقالي كتييييير اوي متبسطش زي ما اتبسطت في اليوم ده
بجد شكراً لكل اللي نورونا يومها.. كان يوم حلو بيكم كلكم :)

بس بداية 2011 مكنتش مبشرة
لسه بفكر هعمل ايه قبل ما انام يوم الجمعة لقيت الخبر بتاع الانفجار في الاسكندرية.. ربنا ينتقم من اللي كان السبب في قتل واصابة وترويع ناس كل ذنبهم انهم كانو بيصلوا في دار العبادة بتاعتهم
وييجي كمان تاني حدث على المستوى الشخصي في اول يوم في السنة..اخسر حد قريب مني مكنتش اتمنى بأي حال من الأحوال اني اخسره.. ومفيش في ايدي حاجة اعملها.. وحش اوي احساس العجز ده
والاسوء من ده انك تخسر نفس الشخص كذا مرة.. وتعيش احساس الفقد ده كل مرة

هنحاول نتغاضى عن بداية 2011.. ونركز في باقي السنة.. لسه قدامنا كتير بإذن الله
ناوية لسنة 2011 دي على نوايا كتير ان شاء الله.. بس خايفة من حاجات كتير
وبدعي ربنا يوفقنا ويفرح قلوبنا في السنة الجديدة
ويسترها مع البلد دي اللي مش عارفة رايحة على فين

كل سنة وانتم طيبين