11 يناير، 2011

حلمي الجديد.. مستنياك

حلم مات.. وحلم بيفكر يموت
وحلم بيشق سكته وسط الغيوم
لساك يا حلم تايه؟
لساك هناك بتبصلي؟
بتقولي فوقي م الألم
ازاي تسيبي خطوتك تطرح ندم !!

حلمي اللي تايه من سنين
لفيت هنا.. وكمان هناك
دورت بين كل الأماكن
يمكن ألاقي قلب
يريح الجرح اللي ساكن

بس النهاية مش هنا
لساك فاكرني مِسَلِّمة؟
ده انا كنت فاكراك من سنة
كنت الهنا.. وكنت المنى
وادي السنة عدت سنة
وسنين كتييييييير
وفضلت انا


ورجعت تاني من جديد
بنده عليك.. والصوت بعيد
والصوت صداه جوايا
بس..
خايف ليوصل بالسكوت
فيزيد سكوت
ويزيد أمل
يمحيه ألم

حلمي اللي تايه من زمان
كفاياك كلام
كفاياك آلام
الوقت حان
لاجل ما يطلع زهر نور وسط الظلام
يطرح بذور الحب ويا الأمل
فتزيد حياة.. وتزيد نغم
فأحلم الحلم الجديد
ويعدي حد السما
يبدأ ينور دنيتي

يمحي الأماني المظلمة

حلمي الجديد..
مستنياك..
مستنياك..
مستنياك..


إهداء إلى العام الجديد
مستنية أحلام حلوة كتير معاك
متخذلنيش
:)

12 طاروا معايا في الأحلام:

ابو فارس يقول...

الله
جميله وبهيه
كلماتك و جياشة ورقيقة
كفراشة ترشف من رحيق
الازهار
دمت ودام قلمك متألق فى سماء التدوين
تحياتي

Timo.. يقول...

ورجعت تاني من جديد
بنده عليك.. والصوت بعيد

حلو الامل..
بس عارفة لما بيتكرر من سنة لسنة وكمان بيتكرر عدم تحقيق الآمال..؟
بيبقى عامل زي نوع من العقاب الابدي اللي برضة بنصر اننا نعملة..
تقريبا زي اسطورة سيزيف..!!

"مستنية أحلام حلوة كتير معاك
متخذلنيش"
يااااااااااارب :)

Ms Venus يقول...

كلمات جميلة يا دعاء

جميل اننا نحلم ونستنى تحقيق الحلم

وحتى لو متحققش

جميل اننا لا نفقد الامل فى تحقيقه

نستنى وننادى عليه تانى وتالت

دمتِ بحب

still-searching يقول...

ارفع لجنابك الشابوه
بجد كل مرة بتتفوقي على نفسك يا دودو


رائع جدا وتصفيق حاد

MaNoO يقول...

قعدتى تودينى يمين وشمال بس اهم حاجه فىا لاخر انك ختمتى بتفاؤل لان بصراحه دا المطلوب دلوقتى على فكره انا طرت مع الكلام مش عارف ليه يمكن عشان املك حلم كدا ومستنيه برده كلام حلو على فكره جدا
تحياتى يابنت بلدى

مجرد حلم صغنتوت يقول...

ابو فارس
تسلم على الكومنت الرائع ده
نورتني

ــــــــــــــــــــــــــــــــــــــــــــــــــــــــــــــــــــــــــــ
Timo
متهيألي العقاب الابدي ده تعبير مناسب على الاحساس ده
اصعب حاجة الامل في حاجة مستحيلة !!

ياااا رب كلنا :)

ــــــــــــــــــــــــــــــــــــــــــــــــــــــــــــــــــــــــــــ
Ms Venus
هو الجميل اننا منفقدش الامل في تحقيقه
بس لو اتأكدنا ان الحلم مفيش فايدة معاه نحلم حلم تاني ومنقفش ومنمتش قدام الحلم الاول
تسلمي لمرورك :)

ــــــــــــــــــــــــــــــــــــــــــــــــــــــــــــــــــــــــــــ
still-searching
ربنا يخليكي ليا يا لولتي
رافعة معنوياتي دايماً كدهو :)

ــــــــــــــــــــــــــــــــــــــــــــــــــــــــــــــــــــــــــــ
MaNoO
اهو اي حاجة اختمها بتفاؤل
مكنتش طالباها اكتئاب.. الوقت ده محتاج كده فعلا
تسلم يا فندم على رأيك :)

فريق الرعاية الطبية يقول...

مدونة داء ودواء مدونة طبية غير هادفة للربح تهتم بالتثقيف الصحي
http://patienteducationteam.blogspot.com/
إذا أعجبك محتواها من فضلك قم بنشرها وساعدنا في الدعاية لها لإفادة أكبر عدد ممكن.

MaNoO يقول...

ولى عوده فى البوست مره تانيه
عامل فكره فى مدونتى ياريت تشرفينى وتشوفيها وهيا عن حمله انترنت بلا فتنه بتاع الدكتور عمرو خالد
عايز نحاول نخلى المدونين كل واحد ينزل بوست عن الحمله شوفى البوست ولو فى اى استفسار انا جاهز
اوعى تتاخرى والغدا هناك فى المدونه اما تيجى

(حلـم) يقول...

اتمنى ان تكون سنة حلوةةةة عليكي


وكل لحظة والحظ والفرح حليفك


احلى اجمل الاحلام اتمناها لك


في كل نفس تتنفسين

مووووووودتي


لاجمل حلم صغنطوت

daloo3a يقول...

أن شاء الله كل الأحلااام تتحقق ^^

مجرد حلم صغنتوت يقول...

Manoo
انا مش عارفة المطلوب لما نشارك في الحملة نعمل ايه غير اللوجو ؟؟ الحاجات اللي بنشرها بخلي بالي منها كويس وببقى واخدة بالي انا جايباها منين بالظبط
مش عارفة ايه تاني ممكن يتعمل؟؟

ـــــــــــــــــــــــــــــــــــــــ

حلم
نورتني بمرورك العطِر
ياا رب تبقى سنة حلوة علينا كلنا ونحقق كل اللي بنحلم بيه.. ويكون حلمك مش مجرد حلم ويدخل في حيز الواقع :)

هستنى مرورك مرة تانية لاي نقد على الموضوع.. دي اول مرة اكتب بالعامية ويهمني رأيك
تحياتي لك :)

ـــــــــــــــــــــــــــــــــــــــ

daloo3a
ان شاءالله كل أحلامنا تتحقق
نورتيني :)

غير معرف يقول...

جميله جدا

إرسال تعليق

سيب بصمتك... سيب كلمتك...