30 مايو 2011

عيد ميلادي وحملة التدوين اليومي

أنا جاية النهاردة علشان اقولكم حاجتين
اولاً عيد ميلادي كان يوم السبت اللي فات.. 28 مايو
انا دوناً عن باقي الناس بحتفل بعيدين ميلاد
الميلادي... في 28 مايو
والهجري.. يوم عيد الفطر
اصل انا مولودة يوم العيد.. طبعا الناس كلها كانت بتحتفل بمجيئي للحياة.. الدكتور وعيلة الدكتور وعيلة بابا وماما ...محدش عيّد في بيته يومها طبعا :D

عيد ميلادي السنة دي مختلف كتيييييييير عن السنة اللي فاتت
لأول مرة من ساعة التخرج على الاقل احس اني بدأت اقرب شوية من حاجة هتوصلني للي انا عايزاه
السنة اللي فاتت كان كلها آلام وضغط نفسي وعصبي مكنتش قادرة استحمله
السنة دي بدايتها كانت الثورة وما بعد الثورة.. التغيير اللي في البلد كلها.. الثورة الداخلية جوه كل واحد.. احساسي اننا في طريقنا لمصر أحلى واجمل بكتييير من قبل كده

انا بادءة السنة دي بتفاؤل وثقة كبيرة بربنا اني هوصل ما دام انا عايزة اطور نفسي علشان اعرف اطور اللي حواليا.. عايزة اوصل لنفسي علشان افيد في وقت بعد كده غيري.. وان شاء الله هوصل

عايزة افضل مبتسمة رغم اي حاجة.. واكيد هلاقي حاجات كتير تضايق او تحبط.. بس ربنا يقدرني واعديها من غير ما تأثر عليا زي زماااان

كل سنة وانا متفائلة..... ياااا رب :)

-----------------------------------------------

ثانياً
انا قررت ولأول مرة في عمر مدونتي اني اشارك في حملة التدوين اليومي خلال شهر يونيو 2011 ان شاء الله
هقابلكم كتير خلال الشهر ده يمكن اعرف اعوض الفترة اللي فاتت
بحبكم

22 مايو 2011

شهيق وزفير


أغمض عيني وأبتسم
روحي تلمس قلبي فينتعش ويفيق من غفلته
تنخفض الإضاءة المحيطة فأدخل في حالة من الاسترخاء لم أعيشها من قبل
تتلخص الحياة في شهيق يحمل عبق التفاؤل وزفير يطرد روح اليأس

أستنشق حريتي وأزفر ألمي في كل لحظة
أزداد صفاء وراحة
وقتها أرى الحياة كأني لم أرها من قبل
أراها بلا قيود..بلا حدود..أراها ممر أستطيع تخيله كالزقاق أو كالميدان
أفتح عيني فأقف على رأس هذا الممر
يكون ضيق في بدايته.. أستطيع جعله متسع في منتصفه.. نهايته لا أستطيع رؤيتها من الآن لكن آمل أن تكون متسعة أيضا

شهيق أمل.. زفير حب
شهيق روح.. وزفير جرح
لأول مرة اكتشف هذا الكم من الأنفاس في الدقيقة الواحدة

أحيانا يكتشف الإنسان أشياء يعيشها ولا يدري كيف يعيشها فتضيع منه للأبد
هو عمر واحد وحياة واحدة

سأغمض عيني مجددا كي أرسم حياتي.. ويوم يكتمل الرسم سأمحو خدوش الزمن عليه.. يوما ما سأستطيع

 ===============================
أصدقائي المدونين
انا مقصرة معاكم ومع مدونتي بقالي فترة كبيرة.. بس انا في مرحلة تغيير هتغير حياتي كلها بعد كده.. يا رب تبقى للأحسن
خايفة وقلقانة من اللي جاي.. بس متفائلة خير اوي بربنا علشان عارفة انه جنبي في كل خطوة انا عملتها او لسه بعملها

بحب مدوناتكم واحدة واحدة وهرجع تاني قريب اوي ان شاء الله :)