3 مارس 2011

بكيت وما زلت أبكي !!

بكيت ومازلت أبكي

يمكن ميكونش من حقي إني أبكيكي
وازاي أبكيكي
بعد ما كنا بنتسابق
مين اللي هيروح الجنة قبل التاني
انا اللي شجعتك
وهم اللي قتلوكي
وقتلوا أحلى حاجة حصلتلي في حياتي

بكيت ومازلت أبكي

هو انتي حاسة بيا؟
يعني لما بفتكرك بتعرفي؟؟
ولما أنام علشان يمكن أحلم بيكي
بتُصِّري إنك متسيبنيش لوحدي
في ضلمة الحلم
وأنا عايز ايه اكتر من إنك تيجيلي
في حلم بعيد
وتمسحي دمعي
أصلي بعيط حتى في الحلم !!

بكيت ومازلت أبكي

أنا مبسوط بس لاني عارف إنك مبسوطة
ما انتي كسبتي الرهان
وسبقتيني.. ومستنياني هناك
أقولك
أنا كمان مستنيكي هنا
وازاي اشوف غيرك
ممكن حد تاني عينيه تندهلي؟؟
حتى لو ندهتلي.. مش هعرف أشوف غيرك

بكيت ومازلت أبكي

قالوا عليا مجنون لما حبيتك من أول نظرة
وقالي عليكي مجنونة لما وافقتي من أول همسة
وقالوا علينا مجانين
لما مسكنا ايد بعض
ونزلنا ميدان التحرير.. والحرية
وبالنسبة لينا ميدان الحب
كان لازم نعرَّف مصر إننا بنحبها.. زي ما حبينا بعض.. ويمكن اكتر
وقالوا عليا مجنون لما اعتبرتك مراتي من يوم ما قتلوكي
تفتكري إحنا فعلاً مجانين؟؟
وحتى لو مجانين.. ده أحلى جنان
وأحلى منه إنك معايا فيه

بكيت ومازلت أبكي

أنا شفت النهاردة شوية عصافير حلوة أوي
وحمامة سلام
كانت رقيقة
وحيدة
صافية
جميلة.. زيك
جبت شوية حبوب
ورمتها في الهوا
علشان أنا عارف انك كنتي هتعملي كده
كنتي دايماً بتقولي
اشمعنى العصافير دي حرة
واحنا محبوسين
حبيبتي
احنا اتحررنا
كان نفسي تكوني معايا
واحنا بنتنفس أول نسائم الفخر
بس انتي كنتي معايا.. في قلبي
يا رب يكون نَفَس الحياة الجديدة عجبك
وحستيه في دمي وهو بيمر على قلبك.. وقلبي

حبيبتي
مش هنساكي
مش هقدر أنساكي
سامحيني
واستنيني

شكر خاص لـ خالد كامل

6 طاروا معايا في الأحلام:

saragebaly يقول...

مـُوجعة اوي اوي اوي

ربنا يصبر كــل قلب ويرزقنا حسن الخاتمة

تحياتي لكـِ

سارة

قلم رصاص يقول...

كلمات مؤثره جدا
ربنا يرحم كل شهداء الثورة

وربنا يكرمك على البوست دا
تقبلي تحيتي
:)

Ms Venus يقول...

حقيقى مؤلم


ربنا يصبره يارب ويصبر كل اهالى الشهداء

re7ab.sale7 يقول...

ياااااااااااااة بجد
صعبة اد اية
والاحساس ده
بجد
مش عارفة اقول اي شيء
انا حسيت بكل حاجة كأني انا

قول ياااارب يقول...

يااااااااااااه اد ايه صعبه اوووى وبتوجع اوى اوى بس اكيد الجنه احسن من اى حاجه تانيه
جميله اوى يادودو سلمت يمناكى

مجرد حلم صغنتوت يقول...

اسفة جدااا على تأخري ف الرد
دعواتكم علشان الفترة دي ملخبطة شوية :S

sara gebaly

آميييين ياااا رب
تسلمي لمرورك :)

===================================

قلم رصاص

ربنا يرحمهم كلهم ويصبر اهلهم يااا رب

===================================

Ms Venus

ياااا رب ياااا رب

===================================

Re7ab Sale7

انا اول ما شفت الصورة برده حسيت بكده
احساس صعب اوي.. ربنا يصبره ويصبر كل اللي زيه

===================================

قول ياااارب

اكيد الجنة احسن من اي حاجة فعلا
فعلا يابختها
ربنا يتقبلها مع الشهداء ياااا رب

تسلمي لمرورك الجميل :)

إرسال تعليق

سيب بصمتك... سيب كلمتك...