10 يناير 2012

مراقبة الانتخابات - تجربة فريدة من نوعها 3,4 يناير 2012


يوم 3 و4 يناير 2012 شرفت اني اكون مراقبة للعملية الانتخابية تبع جمعية كل المصريين لحقوق الانسان بتصريح من اللجنة العليا للانتخابات
بدأت اليوم تقريبا من الساعة 9.. اللجان اغلبها اتفتح في معاده الساعة 8 واللي اتأخر اتأخر حاجة بسيطة - الكلام ده على الحيز بتاعي في شارع كلية اداب والثانوية
بدأت دخول اللجان تباعاً


شارع الثانوية:

  • لجنة مدرسة العسكرية
  • المدرسة الميكانيكية المتقدمة
  • المدرسة الزخرفية
  • مدرسة سيدي يونس



 ملاحظات في شارع الثانوية:

  • مدرسة سيدي يونس كان فيه ناس بتصوت مع بعضها ورا البرفان
  • قدام المدرسة على الجانب الاخر من الطريق اللي هو فرق 10 متر مثلا واحد قاعد بلاب توب بيشوف اللجان للناس تبع مرشح اسمه علاء رزق نازل فردي فئات
  • محل حلاق اعتقد برده كان مشغل كمبيوتر لنفس الغرض تبع نفس المرشح
  • توجيه مباشر للمرشح الفردي وحيد فودة.. ده حصل معايا انا شخصيا وانا لابسة اي دي المتابعة :D
  • كان فيه مجموعة تانية برده بتوجه لمرشح على اول الشارع بس شكوا فيا للاسف معرفتش اقرب منهم
  • لاب توب اعتقد للسلفيين والله اعلم على اول الشارع برده
  • ورق اتوزع على اول الشارع باسم الثورة مستمرة (الورق ده بالذات كان مريب شوية لاني وقتها مكنتش لابسة الاي دي وكنت بعيد عنه ولقيت واحد جايلي مخصوص بيقولي حضرتك نازلة متابعة صح !!! قلتله اه قالي طيب فيه ورق بيتوزع على اول الشارع ولما رحت اصوره اللي كان بيوزع كان عارف انه مخالفة وهو نفسه قال كده وقلتله طبعا وصورته وصورت الورقة وخدت نسخة منه )

شارع كلية آداب:

  • مدرسة شجرة الدر
  • مدرسة الامام محمد عبده
  • مدرسة خالد الطوخي
  • المدرسة اللي جنبها مش فاكرة اسمها ايه
  • الثانوية الجديدة للبنات

ملاحظات في شارع كلية اداب:
خيمة الحرية والعدالة وقدامها الناحية التانية خيمة حزب النور
اعضاء حملة الثورة مستمرة كانو لابسين تيشرتات عليها صورة الهرم واي دي برده عليه الصورة دي
بصراحة مدرسة الثانوية الجديدة من اكتر اللجان إلتزاماً ونظاماً
لجنة كبيرة من الجيش كانت بتمر.. قطعو اليفط اللي كانت متعلقة على المدارس في وقتها على طول
شارع الجلاء:

  • مدرسة عمر بن عبد العزيز
  • مدرسة الزراعة الثانوية
  • التكوين المهني
ملاحظات في شارع الجلاء:

  • اتوبيس عليه استيكر الحرية والعدالة وناقل ناس
  • مقر الحرية والعدالة اللي قبل السلخانة واللي جنب البريد مفتوح
  • مقر المرشح الفردي عمرو موسى مفتوح
  • مدرسة الزراعة كانت الزحمة جوه كتير جدااا وكان فيه طول الطريق جوه ناس قاعدة بتوجه الناس اللي داخلة (التوجيه جوه المدرسة لحد اللجان) لحزب النور
  • عريبة وحيد فودة كانت رايحة جاية في الجلاء
  • مقر هشام الداودي اتفتح شوية وبعدها اتقفل

شارع مستشفى الصدر:
مدرسة شهداء 25 يناير
الملاحظات:

  • المدرسة دي بالذات كان عندي مشكلة معاها.. لجنة 54 و55 فيها المستشار كان بيطرد اللي بيدخلو متابعين.. قالولي كده قبل ما ادخله.. دخلت وقفت دقيقتين وبعدها لقيته بيقولي مش تابعتي يلا اتفضليالمستشار كان بيدخل مع الناخبين ورا البرفان.. الله اعلم كان بيخليهم يكتبو ايه بس دخل قدامي مع كذا حد ورا البرفان ومكنش الناس دي ولا كبيرة في السن لدرجة انها متعرفش تكتب ولا مش بتعرف تقرا وتكتب اصلا لانهم كانو بيمضوا قبل ما يدخلو قدامي
  • المدرسة دي بالذات عديت عليها في اليومين حوالي 4 مرات مثلا وحضرت فيها التقفيل اول يوم والنور قطع قبل التقفيل ب10 دقايق وكانو بيقفلو على نور الموبايلات والشمع
  • كان فيه توجيه مباشر قدام المدرسة للسيدات.. صورت واحدة فيديو وهي بتوجهني لحزب النور
  • على طول الشارع كان فيه سلفيين بأجهزة لاب توب



مدرسة سيدي يس:
اجهزة لاب توب تبع الحرية والعدالة قدام اللجنة


المعهد الديني الأزهري:
الشباب بتوع المعهد بصراحة عاملين شغل حلو اوي في التنظيم جوه وكانو بيمنعو توجيه اي حد جوه


مدرسة شجرة الدر بجديلة:
بجوار المدرسة محل مفتوح لحساب حزب النور وكم سلفيين قدام المدرسة رجالة وستات بياخدو اي حد داخل المدرسة يكلموه ولو مش عارف رقمه يجيبهوله


مدرسة جديلة الاعدادية:
ناس قاعدين بلاب توب على طول الطريق معرفتش احدد هم تبع مين
الظابط المسئول عن المدرسة لقيته بيقولي متطوليش هم 5 دقايق وتخرجي.. مش عارفة ليه بصراحة انا دخلت وقعدت براحتي وخرجت بعدها


مدرسة الصم والبكم:
لاب توب اعتقد تبع حزب النور جنب سور المدرسة
مفيش حاجة مميزة تانية


مدرسة السيدة عائشة:
لاول مرة ألاقي حد بيوجه للكتلة المصرية ومرشح فردي ولاء الحسيني


مدرسة ام المؤمنين:
كان فيه واحدة بتوجه الناس لوحيد فودة جوه المدرسة قدام اللجان.. تقريبا موظفة بس ملحقتش اعمل حاجة لاننا كنا قبل غلق اللجنة النهائي ب5 دقايق مثلا
دي اللجنة اللي حضرت فيها التقفيل ونقل الصناديق للاستاد.. المستشار موافقش اي حد من المناديب يركب مع الصناديق ورا.. ركب معاها اتنين موظفين بس
العربية كان فيها الملازم قدام جنب السواق ووراه بعربية تانية الاربع مستشارين وعربيات المناديب وميني باص فيه باقي المناديب
قابلو عربية تانية من لجنة شهداء 25 يناير ومشيو ورا بعض لحد الاستاد
العربيات كانت ماشية من غير تأمين تماما.. ولا مدرعة ولا دبابة ولا اي حاجة خالص
عربية منهم دخلت الدراسات.. للاسف ملحقتش ادخل وراها والتانية كملت على طول للاستاد
الهرج والمرج اللي كان يومها عند الاستاد كان اكتر من اللازم.. عربيات من لجان تانية كانو سايبين المناديب مع الصناديق ورا فكانو راكبين فوقها بالمعنى الدقيق
الدخول كان مهزلة.. المستشارين نفسهم كانو بيتمنعو من الدخول والمناديب والمراقبين.. الناس كانت بتتسلق عربيات الصناديق علشان يدخلو معاها لانها كانت العربيات الوحيدة اللي بتدخل بسهولة


ملاحظات عامة:

  • التوجيه المباشر اللي شفته بعيني قدام اغلب اللجان كان من حزب النور وحزب الحرية والعدالة.. حققو رقم قياسي في خرق الصمت الانتخابي يومها
  • المستشارين كانو بيعالجو المواقف بطرق مختلفة.. يعني قدامي مستشار جاتله واحدة عجوزة اوي ومش بتعرف تقرا ولا تكتب قالها اختارلك مين يا حاجة.. قالتله مش عارفة اي حاجة.. في الاخر خلاها تحط ايدها على اي رمز واختارهولهامستشار تاني حصل معاه الموقف ده مرضاش يخليها تكتب حاجة وهي مش عارفة كده وخلاها تسيب الورق فاضية... صوت باطل يعني
  • أغلب المستشارين كانو بيرحبو بينا ومش بيضايقو من وجودنا
  • الناس مش فاهمة ايه مهمة المتابع او المراقب.. الموظفين كانو بيتعجبو جداا لما يلاقوني داخلة والمستشار بيرحب بيا.. اكتر سؤال اتسألته:
  • هو انتي بتقبضي مرتب من الجمعية دي؟
  • هو انتو ليكو مقر هنا؟
  • هو انتي من المنصورة؟
  • وكانو بيبقو في قمة الاذبهلال لما يعرفو اني صيدلانية واني متطوعة واني مش باخد حاجة من الشغل ده بس بيفضلو متوجسين مني خيفة كده :D

من اكتر المواقف الكوميدية.. لقيت مندوبة من حزب النور جوه لجنة بتقولي هو انتي رأيك ايه في موضوع انهم يشوفو وش المنقبة علشان تدلي بصوتها؟ قلتلها المفروض قانونا لازم المستشار يشوفها بس وديا بيخلي حد من الموظفات يشوفها.. يبقى غلس اوي يعني لو اصر يشوفها بنفسه وفيه موظفة موجودة.. لقيتها بتقولي ما انتو كويسين اهو مال ايه بقى :D :D


دي اغلب ملاحظاتي في اليومين بتوع الانتخابات
الفيديوهات هنزلهالكم لما بس افضى ارفعها كلها لانها كتير شوية
بما اننا بنعيد كلاكيت تاني مرة فأعتقد المرة دي هدور على حاجات معينة وانا بلف على اللجان

تجربة فريدة من نوعها

8 طاروا معايا في الأحلام:

MaNoO يقول...

كانت الانتخابات ممتعه فى الدفهليه عموما مش عارف ليه
احنا جبنا كارنيهات المراقبه وكل واحد فى المركز بتاعه ولو حكيت هقول بلاوى مواقف مضحكه على محزنه بس فىا لاخر تجربه ممتعه

norahaty يقول...

اكيد تجربة فريدة من نوعها
وأهى الأنتخابات خلصت والنتايج ظهرت
والبرلمان اتشكل ورئيسه ونائبيه تقريبا
بقوا فى حكم المعروفين باقى:الإنجاززززز
ربنا يوفق الجميع يارب

مجرد حلم صغنتوت يقول...

مانو
انا قلت اكتب اللي حصل معايا علشان افتكره لما ننزل بعد 5 سنين انتخابات تاني
تعتقد الوضع هيبقى احسن؟؟

norahaty
الحمد لله انها خلصت
احنا عدناها مرتين هنا ف المنصورة.. حاجة زي الفل يعني
باقي الانجااااز فعلا.. يا رب يعملو حاجة مفيدة

غير معرف يقول...

ثقافة الهزيمة .. عصابة البقرة الضاحكة 6‏

و فى حوار مع القيادى الأخوانى إبراهيم صلاح المقيم فى سويسرا منذ عام 1957 و نشرته جريدة المصرى اليوم فى 23 إبريل 2011 جاء فيه:

وما صحة ما بعض المواقع من أخبار عن رفض سويسرا عرضاً مصرياً لشراء بنادق قناصة وقت الثورة؟
- حدث بالفعل وحكاها لى أحد رجال المخابرات السويسريين فى حضور عدد من الشخصيات العامة، وقال أنه بعد أندلاع الثورة بيومين تقدم السفير المصرى فى سويسرا مجدى شعراوى، وهو صديق مقرب من «مبارك»، بطلب للحكومة السويسرية لشراء عدة آلاف من بنادق القناصة سويسرية الصنع بها تليسكوب يقرب لمسافة 1000 - 1500 متر، وجهاز يحدد المنطقة المطلوب أصابتها، وجهاز رؤية ليلية ويتم التصويب بدقة الليزر، وذخيرة مخصوصة وهى لا تُحمل باليد، ولكن لابد من تثبيتها على قاعدة ويُقدر سعر البندقية الواحدة بنحو 4000 دولار، ولكن الحكومة السويسرية رفضت الطلب.

الحكومة السويسرية أدركت كيف سيتم أستخدام تلك البنادق، وبالتالى رفضت أن يكون لها أى دور فى تلك العملية. و تحت عنوان " لواء شرطة : مبارك كان يتسلى بالشرائط الجنسية للفنانات" ...

باقى المقال فى الرابط التالى www.ouregypt.us

و المقال به معلومات هامة عن عمر سليمان

MaNoO يقول...

يمكن ردى متأخر بس مدخلتش من زمان :)
ان شاء الله الوضع هيبقى احسن بعد 5 سنين لان مستمرين فى الثوره وعارفين اهدافها ايه مهما كان اللى واقف فى طريقها عسكر احزاب سياسيين اقذر من بعض
مهما حصل اللى جاى احسن بالشعب اللى عايز يحقق كل اماله فى البلد دى

Timo.. يقول...

انا بعيد عن التدوين بقالي فترة
بس انت من الناس اللي ديما باحاول اتابعها وباستنى زيارتها من وقت للتاني..
عشان كده..
جيت اقولك..
كل عيد وانت طيبة..

Timo.. يقول...

أأأ...أ..أ.. بس عجبتني كلمة (فريدة) في العنوان :)

مجرد حلم صغنتوت يقول...

مانو

انا بقى اللي مبدخلش من زمااااان جدااااااااا
حاسة اني لما دخلت وبصيت على الموضوع ده بعد كل اللي حصل ندمت على ثقتي في ناس وتعبي وتعب كل زمايلي علشان يوصلوا المجلس.. وفي الاخر كله كان بيتفرج !


تيمو
وانت طيب وبكل خير دايماً يا رب :)

كلمة فريدة محليَّة العنوان اساسا :) :)

إرسال تعليق

سيب بصمتك... سيب كلمتك...