4 يناير 2011

مرحباً 2011.. يا ترى مخبيلنا ايه!!

خلصت 2010
كانت سنة عجيبة بكل المقاييس.. فرح يليه حزن يليه حلم يليه ألم
أحداث كتييييييير اوي.. كتير منها كان مؤلم.. وبعضها كان مفرح.. والباقي كان مفرح واتقلب لمؤلم
ظلمت نفسي كتيييير اوي في 2010
وزعلت من ناس كتير.. وزعلت من نفسي كتير.. وزعلت ناس مني.. يا رب يسامحوني على ده
وحطيت احلام واهداف كتير.. وسبتها ومحققتهاش.. ساعات غصب عني بس المهم انها كانت احلامي واهدافي انا.. وسبتها في الاخر
 
كنت عايزة 2010 تخلص علشان احس بأمل جديد مع سنة جديدة
وكان مسك الختام ليه يوم 31/12/2010.. لقاء المدونين في المنصورة
كان بقالي كتييييير اوي متبسطش زي ما اتبسطت في اليوم ده
بجد شكراً لكل اللي نورونا يومها.. كان يوم حلو بيكم كلكم :)

بس بداية 2011 مكنتش مبشرة
لسه بفكر هعمل ايه قبل ما انام يوم الجمعة لقيت الخبر بتاع الانفجار في الاسكندرية.. ربنا ينتقم من اللي كان السبب في قتل واصابة وترويع ناس كل ذنبهم انهم كانو بيصلوا في دار العبادة بتاعتهم
وييجي كمان تاني حدث على المستوى الشخصي في اول يوم في السنة..اخسر حد قريب مني مكنتش اتمنى بأي حال من الأحوال اني اخسره.. ومفيش في ايدي حاجة اعملها.. وحش اوي احساس العجز ده
والاسوء من ده انك تخسر نفس الشخص كذا مرة.. وتعيش احساس الفقد ده كل مرة

هنحاول نتغاضى عن بداية 2011.. ونركز في باقي السنة.. لسه قدامنا كتير بإذن الله
ناوية لسنة 2011 دي على نوايا كتير ان شاء الله.. بس خايفة من حاجات كتير
وبدعي ربنا يوفقنا ويفرح قلوبنا في السنة الجديدة
ويسترها مع البلد دي اللي مش عارفة رايحة على فين

كل سنة وانتم طيبين

8 طاروا معايا في الأحلام:

MaNoO يقول...

مش عارف ليه كان نفسى اجى لقاء المدونين وكنت حسس انه كان هيبقى من الحاجات الحلوه اللى اعملها فى 2010 خاصه انى عمرى ما رحت لقاء بس الظروف منعتنى وكان غصب عنى وبرده حصل مشكله على المستوى الشخصى فى اخر يوم وبعد ما كنت كتبت بوست الوداع للسنه دى ييجى كمان حادث اسكندريه اللهم ارحمنا رحمتك واحفظ هذا البلد امنا من كل شر
ان شاء الله نحاول على قد ما نقدر نتفائل ونبدا حياه جديده مع السنه الجديده وطول ما احنا عايشين لسه الدنيا مليانه خير وفيها أمل

مجرد حلم صغنتوت يقول...

مانو

متعوضة المرة الجاية ان شاء الله.. بس لازم تجرب تحضر لقاء تدويني.. بجد من أحلى اللقاءات
بتتعرف على الناس على ارض الواقع.. احساس تاني بجد :)

ان شاءالله تبقى سنة كلها تفاؤل وخير علينا كلنا.. ربنا يحفظ بلدنا ويسترها معانا يااا رب

نورتني في السنة الجديدة :)

Unknown يقول...

السلام عليكم
اولا احيك علي اسم المونه
مجرد حلم ... هكذا ينطقها من يراها
ولكن وحدك من تعشينه اجمل حلم

الاسم جميل جدا ماشاء الله

ثانيا
كل سنه وانت طيبه وربنا يجعل السنه الجديده احسن من اللي فاتت بعيدا عن الاحداث اللي حصلت في بدايتها

ثالثا بقي احنا عايزين لقاء في القاهره للمدونين اشمعزا يعني بتوع المنصوره
:)
اخر حاجه علي فكره اعز صحباتي في صيدله المنصوره
وليا اصحااااب كتير جدعان في صيدله المنصوره
:)
اخيرا
مره تانيه كل سنه وانت طيبه :))))

رحــــيـل يقول...

ربنا يسعد ايامك يا دعاء دايما
وكل يوم ينفع يبقى بداية جديدة المهم النية :)

!!! عارفة ... مش عارف ليه يقول...

إن شاء الله خير

الله المستعان

تفائلوا بالخير تجدوه

Sheroo يقول...

حلوة اوى ممكن تشرفى مدونتى

http://sheroo-cinderella.blogspot.com/

you are going to like it

still-searching يقول...

والله يا دودو
لحد دلوقتي عمال يحصل حاجات كتير غريبة في السنة دي
يلا ربنا يستر

ان شاء الله اللي جاي يمكن يكون أحسن :D

ngtah يقول...

كل عام وانت طيبه
وان شاء الله السنه احلى من اللي فاتت

وكل عام واجميع بخير

تحياتي

ابو فارس

إرسال تعليق

سيب بصمتك... سيب كلمتك...