مُجَـــرَّد حُـــلْـــم..

29 مارس 2011

خطوة على الطريق

خطوة تعني الكثير

وخطوة كذلك أجلت بما يكفي

أدعو الله أن يوفقني فيها

دعواتكم أصدقائي المدونين

8 طاروا معايا في الأحلام RSS خرجت للنور بواسطة مجرد حلم صغنتوت في 12:47 ص

3 مارس 2011

بكيت ومازلت أبكي

يمكن ميكونش من حقي إني أبكيكي
وازاي أبكيكي
بعد ما كنا بنتسابق
مين اللي هيروح الجنة قبل التاني
انا اللي شجعتك
وهم اللي قتلوكي
وقتلوا أحلى حاجة حصلتلي في حياتي

بكيت ومازلت أبكي

هو انتي حاسة بيا؟
يعني لما بفتكرك بتعرفي؟؟
ولما أنام علشان يمكن أحلم بيكي
بتُصِّري إنك متسيبنيش لوحدي
في ضلمة الحلم
وأنا عايز ايه اكتر من إنك تيجيلي
في حلم بعيد
وتمسحي دمعي
أصلي بعيط حتى في الحلم !!

بكيت ومازلت أبكي

أنا مبسوط بس لاني عارف إنك مبسوطة
ما انتي كسبتي الرهان
وسبقتيني.. ومستنياني هناك
أقولك
أنا كمان مستنيكي هنا
وازاي اشوف غيرك
ممكن حد تاني عينيه تندهلي؟؟
حتى لو ندهتلي.. مش هعرف أشوف غيرك

بكيت ومازلت أبكي

قالوا عليا مجنون لما حبيتك من أول نظرة
وقالي عليكي مجنونة لما وافقتي من أول همسة
وقالوا علينا مجانين
لما مسكنا ايد بعض
ونزلنا ميدان التحرير.. والحرية
وبالنسبة لينا ميدان الحب
كان لازم نعرَّف مصر إننا بنحبها.. زي ما حبينا بعض.. ويمكن اكتر
وقالوا عليا مجنون لما اعتبرتك مراتي من يوم ما قتلوكي
تفتكري إحنا فعلاً مجانين؟؟
وحتى لو مجانين.. ده أحلى جنان
وأحلى منه إنك معايا فيه

بكيت ومازلت أبكي

أنا شفت النهاردة شوية عصافير حلوة أوي
وحمامة سلام
كانت رقيقة
وحيدة
صافية
جميلة.. زيك
جبت شوية حبوب
ورمتها في الهوا
علشان أنا عارف انك كنتي هتعملي كده
كنتي دايماً بتقولي
اشمعنى العصافير دي حرة
واحنا محبوسين
حبيبتي
احنا اتحررنا
كان نفسي تكوني معايا
واحنا بنتنفس أول نسائم الفخر
بس انتي كنتي معايا.. في قلبي
يا رب يكون نَفَس الحياة الجديدة عجبك
وحستيه في دمي وهو بيمر على قلبك.. وقلبي

حبيبتي
مش هنساكي
مش هقدر أنساكي
سامحيني
واستنيني

شكر خاص لـ خالد كامل

عشق الميدان

6 طاروا معايا في الأحلام RSS خرجت للنور بواسطة مجرد حلم صغنتوت في 1:21 ص

10 فبراير 2011

ثورة القلوب - 25 يناير

قلبي يأن ويطلب الرحيل
رحيل من دنيا أهانته
رحيل من دنيا قتلته
رحيل من دنيا كتمت صوته وكممته

*************
ظل يحلم بالرحيل
بعد أن أرهقه الحلم بالتحرير
ظن أنه لن يرى نوراً في دنياه
فقرر أن يرحل عن الظلام
ويترك خلفه الحياة
فجاء نور الثورة
ثار الشعب
وثار القلب
وثار معهما حتى الدم

*************
شعور جديد
أن تشعر بثورة في دمك
في قلبك
أن تشعر بحياة تدب في جسدك
أن تقتل خوفك
أن تطلق صوتك بعدما كممه الخوف
أن تلقى الملايين تجمعوا من أجلك
من أجل حلمك الذي قتلته من سنين
أن تشعر أنك لست وحدك
أن ترى نوراً يشع في الأفق القريب
ما أنقاها من ثورة عندما تنبع من القلب

*************
حتى مع نقائها حاولوا تلويثها
حاولوا قتلها في مهدها
فانقسم الناس
بعضهم يراها نقية كما هي
والآخر يراها ملوثة بالأحقاد
فرق تسد
حكمة قديمة طبقوها ببراعة.. ونجحوا
لكن ظلت هي نقية طاهرة
شامخة عالية
ترقى عن الشبهات
مهما حاولوا النيل منها
فالنيل طهرها
نقاها
رفعها فوق الجميع
وعلاها

*************
سالت دماهم من أجلنا
سالت دموع الامهات
سالت دموع قلوبهم
من اجل حرية الشعب
ليس من اجل حياة افضل
فقط من اجل الحياة
ضحوا وهم يبتسمون
ماتوا وهم شامخون

*************
ثار الشعب
وثار القلب
ولا يقدر أن يطفئها احد
ثورة شعب تطفأ
تعني شعباً يقتل من جديد
تعني قلباً يقتل من جديد
ثورة شعب تنجح
تعني شعباً يولد من جديد
تعني قلباً يولد من جديد

*************
أريد لقلبي هذا الميلاد
أريد له هذه الحياة

فلتحيا الثورة
فلتحيا الحرية

فلتحيا الحياة

فلتحيا الحياة

1 طاروا معايا في الأحلام RSS خرجت للنور بواسطة مجرد حلم صغنتوت في 4:49 ص

11 يناير 2011

حلمي الجديد.. مستنياك

حلم مات.. وحلم بيفكر يموت
وحلم بيشق سكته وسط الغيوم
لساك يا حلم تايه؟
لساك هناك بتبصلي؟
بتقولي فوقي م الألم
ازاي تسيبي خطوتك تطرح ندم !!
حلمي اللي تايه من سنين
لفيت هنا.. وكمان هناك
دورت بين كل الأماكن
يمكن ألاقي قلب
يريح الجرح اللي ساكن
بس النهاية مش هنا
لساك فاكرني مِسَلِّمة؟
ده انا كنت فاكراك من سنة
كنت الهنا.. وكنت المنى
وادي السنة عدت سنة
وسنين كتييييييير
وفضلت انا

ورجعت تاني من جديد
بنده عليك.. والصوت بعيد
والصوت صداه جوايا
بس..
خايف ليوصل بالسكوت
فيزيد سكوت
ويزيد أمل
يمحيه ألم
حلمي اللي تايه من زمان
كفاياك كلام
كفاياك آلام
الوقت حان
لاجل ما يطلع زهر نور وسط الظلام
يطرح بذور الحب ويا الأمل
فتزيد حياة.. وتزيد نغم
فأحلم الحلم الجديد
ويعدي حد السما
يبدأ ينور دنيتي
يمحي الأماني المظلمة

حلمي الجديد..
مستنياك..
مستنياك..
مستنياك..

إهداء إلى العام الجديد

مستنية أحلام حلوة كتير معاك

متخذلنيش

12 طاروا معايا في الأحلام RSS خرجت للنور بواسطة مجرد حلم صغنتوت في 1:57 ص

4 يناير 2011

مرحباً 2011.. يا ترى مخبيلنا ايه!!

خلصت 2010

كانت سنة عجيبة بكل المقاييس.. فرح يليه حزن يليه حلم يليه ألم

أحداث كتييييييير اوي.. كتير منها كان مؤلم.. وبعضها كان مفرح.. والباقي كان مفرح واتقلب لمؤلم

ظلمت نفسي كتيييير اوي في 2010

وزعلت من ناس كتير.. وزعلت من نفسي كتير.. وزعلت ناس مني.. يا رب يسامحوني على ده

وحطيت احلام واهداف كتير.. وسبتها ومحققتهاش.. ساعات غصب عني بس المهم انها كانت احلامي واهدافي انا.. وسبتها في الاخر

كنت عايزة 2010 تخلص علشان احس بأمل جديد مع سنة جديدة

وكان مسك الختام ليه يوم 31/12/2010.. لقاء المدونين في المنصورة

كان بقالي كتييييير اوي متبسطش زي ما اتبسطت في اليوم ده

بجد شكراً لكل اللي نورونا يومها.. كان يوم حلو بيكم كلكم :)

بس بداية 2011 مكنتش مبشرة

لسه بفكر هعمل ايه قبل ما انام يوم الجمعة لقيت الخبر بتاع الانفجار في الاسكندرية.. ربنا ينتقم من اللي كان السبب في قتل واصابة وترويع ناس كل ذنبهم انهم كانو بيصلوا في دار العبادة بتاعتهم

وييجي كمان تاني حدث على المستوى الشخصي في اول يوم في السنة..اخسر حد قريب مني مكنتش اتمنى بأي حال من الأحوال اني اخسره.. ومفيش في ايدي حاجة اعملها.. وحش اوي احساس العجز ده

والاسوء من ده انك تخسر نفس الشخص كذا مرة.. وتعيش احساس الفقد ده كل مرة

هنحاول نتغاضى عن بداية 2011.. ونركز في باقي السنة.. لسه قدامنا كتير بإذن الله

ناوية لسنة 2011 دي على نوايا كتير ان شاء الله.. بس خايفة من حاجات كتير

وبدعي ربنا يوفقنا ويفرح قلوبنا في السنة الجديدة

ويسترها مع البلد دي اللي مش عارفة رايحة على فين

كل سنة وانتم طيبين