29 سبتمبر 2010

عيد ميلاد مجرد حلم.. البداية

29/9
النهاردة مش يوم زي اي يوم عندي
زي النهاردة من سنة فاتت كان ميلاد مجرد حلم


29/9/2009
بس هو مكنش مجرد حلم وخلاص.. ده كان حلم بقاله سنتين ونفسه يتحقق
مدونتي زي النهاردة من سنة فاتت كان اول يوم ليها
سنة بدأت وخلصت وانا في دماغي نفس الصورة

سنة عاشت معايا ذكريات أقرب الناس ليا ممكن ميعرفوهاش
سنة مرت بكمية أحداث في حياتي متخيلتهاش
سنة حلمت فيها أحلام.. يمكن للأسف معظمها محققتوش.. شوية أحلام ماتت.. وشوية أحلام ضاعت.. وشوية أحلام طلعت أحلام وبس
وشوية صغيرين اتحققوا.. زي ما كتبت بقيت خايفة احلم علشان الاحلام اللي بحلمها بتبعد لحكمة ربنا وحده اللي يعلمها.. بس برده بقيت خايفة أحلم
يمكن العيب في أحلامي.. يمكن العيب في تقديري للأمور
بس الميزة في الأحلام اللي بتضيع أو بتختفي انها زي ما بتكسر الواحد لفترة طويلة أو قصيرة حسب أهميتها.. بعد الكسر ده بتقويه
بعدها بفترة بيحس انه لو مكنش اتكسر الكسر ده مكنش اتعلم حاجات كتير
بيحس انه مكنش هيعرف قيمة نفسه عنده كده
بيحس ان نفسه دي زي ما هي غالية عليه هو كمان غالي عليها اوي.. وازاي سابته يعمل فيها كده وهي مستحملة
زي ما بقول لاصحابي على طول.. نفسنا دي صعبانة عليا اوي من اللي بنعمله فيها


سنة عدت بكل الحلو والمر اللي فيها
ويمكن علشان الواحد كان اصلا متشائم مكنش عارف يشوف الحلو اوي.. فشفت اللي مش حلو بس وهو كان كتييييييير اوي
سنة كلها تخبط وعدم استقرار على كل المستويات.. الشخصي والعملي والاجتماعي وما زال مستمر عدم الاستقرار ده
سنة خسرت فيها ناس مكنتش اتمنى اخسرهم.. وكسبت فيها ناس مكنتش اتخيل اني اكسبهم
سنة بدأت فيها حياتي العملية.. نوعاً ما مش اوي بصراحة
سنة عالجت فيها نفسي اكتر من مرة.. ومكنتش متخيلة اني هعرف أعالجها او ممكن اكون دقيقة اكتر.. مكنتش عايزة اعالجها اساساً بس هي برده استحملت
 
متخيلتش اول سنة ليا في التدوين يحصل كل الاحداث دي في حياتي
واول سنة تدوين ليا حضرت تلات لقاءات تدوينية هنا في المنصورة.. اتعرفت على ناس جديدة وكسبتهم كأصدقاء على أرض الواقع
اول سنة حسيت ان فيه ناس مستنية اللي بكتبه حتى لو كانو قليلين.. بس الناس اللي متابعاني يكفيني احترامهم ليا وللي بكتبه

مجرد حلم كان اسم لأول قصة قصيرة اكتبها.. يا ريت اعرف رأيكم فيها:
بحبكم

11 طاروا معايا في الأحلام:

MaNoO يقول...

ما احلى ان تكون الاحداث مصنوعه من كل شىء حوالينا يمكن تغيير انتى مكنتيش عارفه انه هيكون كدا بس الاكيد انها احداث استفدتى منها مهما كان اللى حصل فيها عشان كدا دايما فكرى فى الافاده اما الخساره فهيا حصلت خلاص ملوش اى لازم التفكير فيها اتمنى ليكى التوفيق دائما والنجاح فى كل مجالات حياتك
مانووووووو

رحــــيـل يقول...

كل سنة وانتى هنا منوره المدونة والفيس بوك و الجروب واللمة و سمعني اجدع سلام بهابى بيرث داى للمدونك
بالنسبة للاحلام .... عارفة الواحد اول لما بيتخرج من الجامعه بيبتدى يصتدم بارض الواقع يا دعاء مش فى الشغل وبس فى حياته كلها عشان بنخرج من عالم الاحلام اللى غالبا بيكون كل حاجة متوقفه فيه بنهاية دراستنا وبداية الجد
فتلاقى الاحلام بدات تتضح اكتر زى ما انتى وصفتيها اللى هيتحقق منها واللى هيفضل مجرد حلم وايه هنبدله باحلام اكثر واقعية وايه هنستغنى عنه خالص

متخافيش من الحلم لان دى مرحلة الاحلام اللى نكون عارفين هتدوينا لفين مش مجرد هروب لجنه وردية احلمى زى مانتى عايزة وانطلقى فى الحياة السنين دى اجمل سنين بجد

Ms Venus يقول...

كل سنة وانتى بخير

ومدونتك وحياتك كلها بخير

Hanan Said يقول...

كل سنه وانتي ومدونتك منورين يارب
والسنه دي ان شاء الله تحققي كل حلم تحلميه
واكتر ما تحلمي كمان
ربنا يسعد ايامك كلها
وتكون سنه تفائل وسعده عليكي يارب
تحياتي لك :)

مجرد حلم صغنتوت يقول...

مانو
بقالي كتير مش شفتك هنا
:) ربنا يخليك
بحاول ابص للفايدة بس من غير الخسارة.. بس لما تبقى الخسارة لسه في وقت قريب بتبقى صعب ان الواحد يتجاهلها تماماً
بس بتيجي بالتدريج
شكراً لمرورك

رحيل
تسلميلي يا سوسو ربنا يخليكي يا رب
بس على فكرة.. مرحلة الاحلام اللي انا فيها دلوقتي لسه مش زي ما انتي بتقولي محددة
لسه بتطلع بره ارض الواقع لاحلام فيها راحة وسعادة شوية عن الواقع
لسه الحلم مش بقى ناضج يعني
بس برده بيحاول اهو

هعديلك الاخطاء الاملائية علشان انتي في بيتي بس :D :P
بهزر معاكي بس
نورتيني يا جميلة :)

Ms Venus
وانتي بألف خير يا رب
شكراً لمرورك :)

حنان سعيد
يا رب تبقى سنة كلها خير وسعادة علينا كلنا يا رب
نورتيني بمرورك الاول.. وان شاء الله مش الاخير :)

بنية آدم يقول...

كل سنة والمدونة طيبة
وكل سنة ودعاء منورة عالم النت
وربنا يجعل كل كلمة بتكتبيها مفيدة وفي ميزان حسناتك.
بالتوفيق وإلي الأمام دوماً

Tamer Moghazy يقول...

دعاء..
كل سنة وانت ومدونتك الجميلة بكل السعادة..
كان نفسي اشوفك في اللقاء بتاع اسكندرية قوي..

صدقيني كل سنة بتعدي علينا..
بنتعلم من الوحش اللي فيها..اكتر من الحلو..
ولازم عشان نعرف طعم الحلو..لازم نجرب المر..
وعشان كده انا بحاول استمتع (باللحظات) الوحشة.. عشان متاكد انه ديما بعدها بتيجي (اللحظة) الحلوة اللي تستحق التعب.

الاغنية تحففففففففففففففة..
باموووووت فيها قووووي..

(واياك تكون زيهم..
تروح وتجرحنا..
ده انت الوحيد منهم ممكن تريحنا..))

مجرد حلم صغنتوت يقول...

بنية آدم
وانتي طيبة يا نيمو :)
يااااااااا رب ربنا يقدرنا يا رب
ربنا يخليكي ليا :)

Timo
وانت طيب وبألف صحة وخير يا رب
انا كمان كان نفسي احضر لقاء اسكندرية
اولا علشان دي اسكندرية.. ودي ليها وضع خاص جداا عندي
وثانياً علشان كنت حاسة ان ناس كتير من المدونين اللي اعرفهم هيبقوا موجودين وكانت هتبقى فرصة اتعرف عليهم في الطبيعة :-s

هو انت اصلا منين؟؟
يعني لما ربنا يسهل والدنيا تمشي كده ولقاء المنصورة المؤجل يتعمل هتعرف تنورنا هنا ولا ايه؟؟ :)

بحاول اعمل كده بس ساعات بتبقى صعبة.. بس فعلاً اللحظة الحلوة دي لما تيجي بعد تعب بيبقى ليها طعم مختلف

كويس ان الاغنية عجبتك.. كلامها حلو اوي بالذات الجملة الاخيرة دي
تسلم على مرورك :)

Tamer Moghazy يقول...

سوري على التاخير..
بس انا ممكن لو فيه ناس اعرفهم اجي :)
بس ابعتي لي التفاصيل عشان مش عارف اي حاجة عن الموضوع :)

Tamer Moghazy يقول...

دعاء..ضروري نتواصل لان فيه حاجة مهمة عاوز اسالك فيها :)

مجرد حلم صغنتوت يقول...

http://www.facebook.com/doaa.sultan

ده بروفايل الفيس بتاعي
بس ضروري تسيب رسالة تعرفني فيها انه انت

اللقاء لسه مفيش اي اخبار عنه.. ربنا يسهل بقى :)

إرسال تعليق

سيب بصمتك... سيب كلمتك...