أبحرت بعيداً في عينيك..

أبحرت بعيداً في عينيك
يملأني شوق يقتلني
فيصير القاتل والمقتول سواء
بحر مترامي الاطراف
وعلى اطرافه تعلو شمس
تبعث بالدفء
قارب يتهادى فوق الموج
يتسارع هو والموج
من يسبق للبر الآمن
ومن يقتل في الخلف!!!

---------------------------------------------------------------------------------------------------------

ملحوظة هامة:

الصورة مقتبسة من مدونة:

فضفضة عالسريع

بجد جامدة جداااااا

8 طاروا معايا في الأحلام RSS خرجت للنور بواسطة مجرد حلم صغنتوت في 2:29 ص

عيد غريب

بقالي كام يوم افتح المدونة علشان اكتب ومعرفش واقفلها وادخل انام

بس النهاردة قلت مينفعش بقى بكرة العيد والعيد فرحة ولازم اعيد على جيراني واصحابي

الاول كل سنة وانتو طيبين وبألف خير دايماً يا رب

ربنا يكرمنا ونكون على عرفات السنة الجاية ان شاء الله

 

ثانياً

انا بقول عيد غريب لأني مش حاساه اصلا خالص

يمكن لما اصلي العيد بكرة ان شاء الله احس بأي معالم للعيد ... مش عارفة بصراحة

هو البعد جفا زي ما بيقولو؟؟؟

كل شوية بيزيد كرهي للسفر.. مع اني بحب السفر جدا

بس السفر الترفيه غير السفر للشغل

اخواتي مسافرين للشغل... لما احس اني لما بشوفهم بعد سنة او اكتر اني مش حاسة بحاجة خالص... ده اسوء احساس ممكن احس بيه

حد فاهم حاجة؟؟

معرفش ليه حسيت ببعد فظيع مع انه واقف قدامي... يمكن بعد اكبر من اللي حسيت بيه وهو مسافر.. حاجة صعبة اوي

عارفة الرد التلقائي لأي حد على كلامي... سنة الحياة

يا جدعان عرفت والله

بس يمكن انا اللي مش عارفة اتأقلم مع سنة الحياة دي بسرعة... يمكن محتاجة آخد وقت شوية على ما اتقبلها ... يمكن فيه حاجات كتير اليومين دول المفروض اتقبلها علشان كده بتقبلهم ببطء... مش عارفة بصراحة

 

معلش على شوية الاكتئاب دول... قلت اطلعهم قبل العيد يمكن اعرف استمتع اليومين دول من غير اكتئاب

وادي خروف العيد

 

عيد بلا اكتئاب عليكم كلكم يا رب :)

11 طاروا معايا في الأحلام RSS خرجت للنور بواسطة مجرد حلم صغنتوت في 3:18 ص

انتي بيتي ومطرحي!!

ده انتي بيتي ومطرحي 

معرفش لو تعرفي

ان انتي سكني اللي بسكن ليه وبرتاح ده قلبي صحي

بابه هو قلبك 

وعينيكي شبابيك بتخليني اشوف النور اللي انا محتاج اليه

ايه الرومانسية دي

احلى حاجة في الاغنية دي انها صادقة

على رأي تعليق قريته عليها على يوتيوب.... تحس انها حلال

واحد بيغنيها لمراته حبيبته اللي هيقضي معاها بقى عمره

وهي كمان اكيد بتحبه

ما هي مكنتش هتبقى بيته ومطرحه لو مكنتش بتموت فيه كمان مش بتحبه بس

ما هو ده الهدف من تلاقي روحين علشان يكونو روح واحدة... قلب واحد في جسدين اكيد حاسين ببعض اوي

وانتي حياتي ودنيتي

وده أملي وفرحتي

وانتي سندي وقوتي

وده زادي في رحلتي

اجمل وصف من واحد لمراته لما تكون عايشة علشان تسعده وتقويه على الحياة... تقف جنبه لما يقع... تسنده لما يتعب

ما هو مين هيقف جنبه غيرها؟ مين هيحس بتعبه غيرها؟ مين هيحبه غيرها؟

وتعالي احنا بقينا لبعضنا

كنا اتنين وهنبقى واحد طول عمرنا

ياااااااااااااه على الجملة دي

كنا اتنين وهنبقى واحد

تلاحم نفسي وعقلي لاتنين يمكن يكون بينهم متناقضات لأن دي سنة الحياة لكن في الآخر بيلتقوا على حاجة واحدة... حبهم لبعض

اجمل حب اللي يخلي اتنين يعيشوا حياتهم علشان بعض... يسندوا بعض.. يضحوا علشان بعض... يسعدوا بعض... يزعلوا على زعل بعض

اجمل حاجة ان احساس حد بالتاني يوصل للمرحلة دي

ساعتها هتهون عليهم الصعوبات اللي هيقابلوها

وتهون عليهم المشاكل اللي هتحصل بينهم... لأنهم عارفين هم اد ايه بيحبوا بعض

يا ترى الحب اللي في الفيديو بالتعبير اللي في الاغنية دي موجود؟؟ ولا ده عالم من الأحلام فقط لا غير؟؟

8 طاروا معايا في الأحلام RSS خرجت للنور بواسطة مجرد حلم صغنتوت في 1:46 ص

هنفضل نحبكم

 يمكن خسرنا الماتش

الحمد لله على كل شيء

لكن مخسرناش احترامنا

ومخسرناش حبنا لمنتخبنا

المفروض ان الواحد حتى لو زعلان ان منتخب مصر مش هيدخل كأس العالم يبقى فرحان شوية ان على الاقل في منتخب عربي هيدخل 

لكن مع منتخب زي الجزائر بأخلاقهم وأخلاق شعبهم دي... حتى لو مكنش الشعب كله .. على الاقل تلات ارباعه... معتقدش اني فرحانة ليهم خالص

ومعتقدش اني هشجعهم في كأس العالم

عن نفسي بحب فريق البرازيل جدااااا

زي الفل على الاقل يبقى فيه امل انه يوصل للكاس في الاخر :)

ربنا يكرم كل فريق مصر والفريق الفني على تعبهم

كفاية انكم جمعتو الشعب كله وراكم يهتف ويقول.... يا رب

محستش احساس التجمع ده قبل كده

كفاية انكم خليتو الناس تقعد تسمع اغاني وطنية اليومين اللي فاتو دول كلهم

وكفاية انكم كملتو لحد هناك في الضغط العصبي اللي كان عليكم ده

يا ترى هنتجمع تاني كده امتى وعلى ايه؟؟؟؟؟

6 طاروا معايا في الأحلام RSS خرجت للنور بواسطة مجرد حلم صغنتوت في 12:21 ص

ألف مبرووووك للشعب الطيب

أحلى حاجة ان الشعب المصري شعب طيب اوي

في لحظة كل الناس نسيت كل الهموم اللي عندها وكل اللي تاعبها وفضلت تهيص وتشجع منتخبنا وعملت افراح لما كسبوا الحمد لله
 

لو اتجمعنا على كل حاجة كده... هنبقى اقوى من اي حاجة

 

يلا

 

المهم

 

ألف مبروووووووووووووووووووووك لمصر

 

وألف مبروك لكل رجالتنا وحسن شحاته بالأخص

 

وألف مبروك للشعب المصري المطحون
 

ويا رب يا رب تكمل فرحتنا يوم الأربعاء ان شاء الله

 

 

 

8 طاروا معايا في الأحلام RSS خرجت للنور بواسطة مجرد حلم صغنتوت في 2:11 ص

دور محدود وخلصت الحكاية

"ان تشعر بأحد ثم تفقد شعورك هذا اصعب من ألا تشعر به منذ البداية"

جملة طلعت في دماغي بعد موقف مش ظريف حسيت فيه اوي بالمعنى ده

تخيل انك في حد قدامك بتعزه وبتحترمه ويمكن بتحبه كمان.... مش شرط حب بمعنى الحب بس ممكن حتى حب الصداقة

ووصلت معاه لمرحلة ان كل واحد فيكم بقى بيفهم التاني من نظرة من غير ما يتكلم

مش كتير بيعرفو يوصلو للمرحلة دي مع بعض.... بس لما يوصلو ليها ده معناه انهم قربو من بعض اوي وحبوا بعض اوي

تخيل بعد فترة وانت تعبان من حاجات كتير فجأة تلاقي الشخص ده اهتمامه بيك بيقل... كمان مش بيقل لكن انك تحس انه معدش فاهمك والاسوء كمان انه معدش حاسس بيك... يعني كلام زمان بتاع انه يحس انك تعبان من غير ما تتكلم ده يروح فجأة... كمان ان الموضوع يوصل انك يكون باين في كلامك انك تعبان او متضايق وانت متأكد ان ده واضح ومع ذلك مش يعبرك.... ايه القسوة دي كلها!!

اصعب حاجة انك تبدأ تفقد حد قريب منك زي الشخص ده... شخص يمكن كان في فترة اقرب ليك من اي حد تاني والاصعب انك متعرفش ده كله بيحصل ليه اصلا... ما هو انت لو غلطان في حقه هو عنده تصريح مفتوح انه يعاتبك ويقولك على اي حاجة ضايقته منك... لكن برده مبيعملش كده

حاجات ملخبطة وناس كان نفسي يبقوا جنبي اكتر من كده في الوقت ده بالذات لكن مفيش في ايدي اكتر من اللي عملته

ربنا يكرمهم ويوفقهم في حياتهم كلها... ويجازيهم خير على الايام الكتير اللي وقفو معايا فيها

يمكن زي ما واحدة صاحبتي قالتلي مرة: " في ناس بنعرفهم لفترة معينة من حياتنا بس علشان هم ليهم دور في الفترة دي بعدها ممكن يختفو حتى لو كان دورهم ده كان كبير اوي... بيبقى خلاص خلص"

يمكن هي كده فعلاً

9 طاروا معايا في الأحلام RSS خرجت للنور بواسطة مجرد حلم صغنتوت في 6:16 م

لقاء المدونين بالمنصورة..... يااااااااااه انا اتأخرت اوي

6/11/2009

اليوم التاريخي ده كان لقاء المدونين بالمنصورة

وكان برده اول مرة اخد خطوة تتحسب ليا في عالم التدوين

يمكن الخطوة جت متأخر اوي بس اكيد كان مكتوبلها تيجي في الوقت ده مش قبل كده

اليوم بجد كان جامد

بداية من اول ما نزلت من التاكسي لقيت الناس بتبصلي وبتقولي انتي مين

طبعاً ولأن ده اول لقاء ليا مع مدونين مكنتش اعرف (انتي مين) دي معناها انتي مدونة ايه :D

وبعدها التبرع بالدم اللي كان في مستشفى الاطفال

طبعا انا اول ما دخلت المستشفى ولقيت ناس من رسالة هناك كنت حاسة اني داخلة بيني

ولو ان صبرني يا رب كانت هتضربني لما عرفت اني من رسالة بس اعمل ايه بقى... رسالة تجري في دمي :)

وبعدها خلصنا وطلعنا على جامع السلاب صلينا الجمعة وبعدها فوراً على كوك دوور للأكل... لازم طبعاً الناس اتبرعت وتعبت يعني

واخيراً نادي الأطباء 

انا اول مرة اقابل حد من مدونات تانية وكنت بصراحة متخيلة اللقاء غير كده... كنت متخيلة اننا هنتكلم كله مع بعضه ونعرف بعض ونعرف مدونات الناس كلها عن ايه او اتعملت ازاي بس يمكن علشان العدد كان كبير مكنش فيه فرصة اننا نعمل ده بس برده كان يوم جامد جداااااا ومندمتش اني جيت مع اني مكنتش اعرف حد خالص

تفاصيل اكتر عن اليوم هتلاقيها هنا

صبرني يا رب... رغي إمرأة غير مطحونة 

شكراً لكل الناس اللي اتشرفت بمقابلتهم النهاردة .... ان شاء الله مش هتبقى المرة الاخيرة

وشكر خاص لكل من:

 صبرني يا رب... رغي امرأة غير مطحونة... كويس انك قابلتيني اول ما وصلت علشان كنت هتوه ومش بعيد كنت ارجع البيت تاني :)

ابراهيم العدوي... كأني أتكلم... اول حد كلمني اول ما نزلت من التاكسي

فاتيما... روح قلب ماما..... اتبسطت اوي اني اتكلمت معاكي

مي... حلم كان... اهي كل الاحلام لازم تبقى معارف برده

شيمو... الشعب لابد له من حكومة تشكمه.. شكراً على العصير :)

ساسو... mourning dove ...... بجد عسولة خالص خالص :)

يوم ميتنسيش

23 طاروا معايا في الأحلام RSS خرجت للنور بواسطة مجرد حلم صغنتوت في 1:57 ص