21 نوفمبر، 2009

انتي بيتي ومطرحي!!


ده انتي بيتي ومطرحي 
معرفش لو تعرفي
ان انتي سكني اللي بسكن ليه وبرتاح ده قلبي صحي
بابه هو قلبك 
وعينيكي شبابيك بتخليني اشوف النور اللي انا محتاج اليه

ايه الرومانسية دي
احلى حاجة في الاغنية دي انها صادقة
على رأي تعليق قريته عليها على يوتيوب.... تحس انها حلال
واحد بيغنيها لمراته حبيبته اللي هيقضي معاها بقى عمره
وهي كمان اكيد بتحبه
ما هي مكنتش هتبقى بيته ومطرحه لو مكنتش بتموت فيه كمان مش بتحبه بس
ما هو ده الهدف من تلاقي روحين علشان يكونو روح واحدة... قلب واحد في جسدين اكيد حاسين ببعض اوي

وانتي حياتي ودنيتي
وده أملي وفرحتي
وانتي سندي وقوتي
وده زادي في رحلتي

اجمل وصف من واحد لمراته لما تكون عايشة علشان تسعده وتقويه على الحياة... تقف جنبه لما يقع... تسنده لما يتعب
ما هو مين هيقف جنبه غيرها؟ مين هيحس بتعبه غيرها؟ مين هيحبه غيرها؟

وتعالي احنا بقينا لبعضنا
كنا اتنين وهنبقى واحد طول عمرنا

ياااااااااااااه على الجملة دي
كنا اتنين وهنبقى واحد
تلاحم نفسي وعقلي لاتنين يمكن يكون بينهم متناقضات لأن دي سنة الحياة لكن في الآخر بيلتقوا على حاجة واحدة... حبهم لبعض
اجمل حب اللي يخلي اتنين يعيشوا حياتهم علشان بعض... يسندوا بعض.. يضحوا علشان بعض... يسعدوا بعض... يزعلوا على زعل بعض
اجمل حاجة ان احساس حد بالتاني يوصل للمرحلة دي
ساعتها هتهون عليهم الصعوبات اللي هيقابلوها
وتهون عليهم المشاكل اللي هتحصل بينهم... لأنهم عارفين هم اد ايه بيحبوا بعض


يا ترى الحب اللي في الفيديو بالتعبير اللي في الاغنية دي موجود؟؟ ولا ده عالم من الأحلام فقط لا غير؟؟

8 طاروا معايا في الأحلام:

غير معرف يقول...

احلام بس حقيقه
لكن موش دايما
الاختيار الصح بيحول الاحلام لحقيقه
الوثوق فى الاخر هو الحقيقه

انا سكره

قلم رصاص يقول...


السلام عليكم

في اول زيارة لمدونة حضرتك الاقي حاجة بجد كويسة غير اللي منتشر اليومين دول حتى عند اصدقائي فيما يتعلق بالأزمة المصرية الجزائرية

بس احب اطمنك ياكتورة .. فعلا الحب الحقيقي اللي التضحية والتلاحم رغم التناقض احيانا ، موجود وبشدة كمان .. لكن اهم حاجة توفيق ربنا .. توفيق ربنا للحب ده هو الضمانه الوحيدة لوجوده وميلاده من رحم الحياه السريعه اللي بنعيشها

انا هاعتبر اول زيارة تسجيل حضور فقط

وان شاء الله تتوالى الزيارات

في امان الله

تحيتي / قلم رصاص

مجرد حلم... صغنتوت يقول...

سكرة
كلامك مظبوط
بس مش كل مرة هيبقى الاختيار الصح بس هو اللي بيحول الاحلام لحقيقة
ساعات بتبقى الاحلام حتى لو كانت حلوة اوي بعيدة اوي لدرجة تخليها متنفعش تبقى حقيقة
شكراً على مرورك :)

قلم رصاص
وعليكم السلام ورحمة الله
نورتني في اول زيارة ليك هنا... ان شاء الله تتكرر كتير.
تقدر تقول مكنتش عايزة اركز في الازمة المصرية الجزائرية علشان متعبش نفسياً ويجيلي اكتئاب... مش ناقصة بصراحة اليومين دول
علشان كمان الموضوع قلب بتصريحات وادعاءات من الجانبين.. معدتش عارفة اصدق مين فقلت أريح حاجة ابطل اسمع الموضوع ده من اساسه
اتفق معاك في ان اهم حاجة علشان الحب ده يكمل ويستمر.. توفيق ربنا قبل اي حاجة تانية... يمكن هو ده الحاجة الوحيدة اللي في كم المشاكل اللي الواحد بيشوفها كل يوم اللي ممكن تساعده وتخليه يوصل للأمان والسكن ده
منتظرة زيارتك دايماً بإذن الله
تحياتي..

حـــلـــم كــــان يقول...

مختاره اغنيه جامده

وكلامته فظيعه وفعلا الواحد بيحس انه بيقولها لمراته

الشعب لابد له من حكومه تشكمه يقول...

لو لقيتيه اباى عرفينى هههههههه.
كل سنه وانتى طيبه:)

اقصوصه يقول...

عسى كل ايامك عيد :)

مجرد حلم... صغنتوت يقول...

حلم كان
شفتي الرومانسية يا بنتي
دنيا... نقول ايه بس :D

شيما
من عنيا حاضر
اول ما الاقيه بس دول بقو عملة نادرة اوي اليومين دول :D
وكل سنة وانتي بألف خير يا رب :)

مجرد حلم... صغنتوت يقول...

اقصوصة
عيد سعيد عليكي
تسلمي على مرورك :)

إرسال تعليق

سيب بصمتك... سيب كلمتك...