11 نوفمبر 2009

دور محدود وخلصت الحكاية


"ان تشعر بأحد ثم تفقد شعورك هذا اصعب من ألا تشعر به منذ البداية"

جملة طلعت في دماغي بعد موقف مش ظريف حسيت فيه اوي بالمعنى ده

تخيل انك في حد قدامك بتعزه وبتحترمه ويمكن بتحبه كمان.... مش شرط حب بمعنى الحب بس ممكن حتى حب الصداقة

ووصلت معاه لمرحلة ان كل واحد فيكم بقى بيفهم التاني من نظرة من غير ما يتكلم

مش كتير بيعرفو يوصلو للمرحلة دي مع بعض.... بس لما يوصلو ليها ده معناه انهم قربو من بعض اوي وحبوا بعض اوي

تخيل بعد فترة وانت تعبان من حاجات كتير فجأة تلاقي الشخص ده اهتمامه بيك بيقل... كمان مش بيقل لكن انك تحس انه معدش فاهمك والاسوء كمان انه معدش حاسس بيك... يعني كلام زمان بتاع انه يحس انك تعبان من غير ما تتكلم ده يروح فجأة... كمان ان الموضوع يوصل انك يكون باين في كلامك انك تعبان او متضايق وانت متأكد ان ده واضح ومع ذلك مش يعبرك.... ايه القسوة دي كلها!!


اصعب حاجة انك تبدأ تفقد حد قريب منك زي الشخص ده... شخص يمكن كان في فترة اقرب ليك من اي حد تاني والاصعب انك متعرفش ده كله بيحصل ليه اصلا... ما هو انت لو غلطان في حقه هو عنده تصريح مفتوح انه يعاتبك ويقولك على اي حاجة ضايقته منك... لكن برده مبيعملش كده

حاجات ملخبطة وناس كان نفسي يبقوا جنبي اكتر من كده في الوقت ده بالذات لكن مفيش في ايدي اكتر من اللي عملته

ربنا يكرمهم ويوفقهم في حياتهم كلها... ويجازيهم خير على الايام الكتير اللي وقفو معايا فيها

يمكن زي ما واحدة صاحبتي قالتلي مرة: " في ناس بنعرفهم لفترة معينة من حياتنا بس علشان هم ليهم دور في الفترة دي بعدها ممكن يختفو حتى لو كان دورهم ده كان كبير اوي... بيبقى خلاص خلص"

يمكن هي كده فعلاً

9 طاروا معايا في الأحلام:

Cute Kitty **sookra يقول...

مساء الخير يادودو
حاسه بيكى اوى
كل حد فى حياتنا له دور مكتوب على ورق حياتنا
ولازم ينتهى فى يوم مهما كبر الدور دا
تحياتى ياقمر

رحــــيـل يقول...

هقولك على حاجه يا دعاء
الناس بتتغير واحنا كمان بنتغير والظروف بتتغير
انا كمان كنت الاول بتصدم جدا وبزعل وبتقهر واشيل فى نفسيتى بس مع الوقت اكتشفت انها سنة الحياة
هونى على نفسك لسه ياما هتشوفى من ده كتير
المهم بجد ان لما دورك ينتهى فى حياة حد تسيبى ذكرى حلوه قبل ما تمشى ولما يفتكرك يبتسم
:))

MaNoO يقول...

هو فعلا كل واحد ليه دور فى حياتنا بس فى أدوار اساسية ومتكررة ومستحيل نزهق منها زى الأهل والأصحاب المخلصين الحالة اللى انتى بتحكى عنها لو حصلت مع حد حتى ل قرب منك اوى ودوره كان كبير بس فعلا يبقى مش من المؤسسين ولا من المخلصين لان دوره كان ثانوى وانتى لازم تعرفى القاعدة فى فى الحياة عشان متتصدميش كل مرة يحصل فيها الموقف تاكدى ان فى اللى دوره أساسى وفى اللى دوره ثانوى وكل يغنى على ليلاه

تقبلى تعليقى المتواضع وبوست ممتع وتحياتى

مجرد حلم صغنتوت يقول...

سكرة
الفكرة ان الواحد ساعات مش بيتقبل ان دور اللي قدامه خلص في حياته او يمكن بياخد وقت على ما يتقبل الواقع ده
علشان كده بتبقى صعبة شوية
نورتيني يا جميل :)

رحيل
انا بقى لسه في الاول ده
لسه بتصدم وبتقهر وبشيل في نفسيتي لدرجة بتحسسني اني هدخل على اكتئاب بسبب المواقف اللي زي دي... يمكن سنة الحياة بس مش عارفة ليه مش قادرة افهمها لحد دلوقتي
عندك حق في حكاية اني اسيب ذكرى حلوة لو دوري انتهى في حياة حد... طيب لو حد دوره في حياتك بدأ ينتهي بس هو مش واخد باله انه بيخلي الذكرى اللي هيسيبها باللي بيعمله ده مش حلوة خالص.. الاحسن ان انا اللي ابعد والعلاقة كويسة احسن ما تبوظ وساعتها مش هتبقى غير ذكرى مؤلمة ولا المفروض اعمل ايه؟؟

مانو
المشكلة اني معدتش بعرف اقيسها هل اللي قدامي ده بكل اللي عمله علشاني في يوم من الايام حتى لو كان دلوقتي مش واقف جنبي دوره ثانوي بس ولا لا؟ هل انا اللي غلطت في حاجة ومش راضية اعترف بكده؟ طيب لو كده حتى ليه زي ما انا ببقى زعلانة من حد وبقوله هو مش بيعمل كده لو باقي على العلاقة الكويسة اللي بيننا؟؟
حاجات كتير بتخليني اقتنع ان العلاقات بين الناس دي هنفضل نتعلمها طول حياتنا لحد ما نموت
يمكن الفايدة من مواقف زي دي زي ما انت بتقول ان الواحد صدمته بتقل مع مرور الوقت..
شرفتني بمرورك :)

مسدس صغير يقول...

فقد اقرب الناس ليك او بعده عنك والاتنين بمعنى واحد بيكون صعب جدا على النفس
بس بنتكيف معاها لأن بجد احنا اتعودنا على كده
كلام صحبتك صح
احييكى على البوست يا دكتور

مجرد حلم صغنتوت يقول...

مسدس صغير
للأسف اتعودنا على كده
ما هي مش حاجة حلوة اننا نتعود على كده... بس نعمل ايه بقى
اللي يعيش ياما يشوف
شكراً على مرورك يا صلاح

Tamer Moghazy يقول...

اشكرك على احساسك وتعبيرك عما يدور بخاطري..

Tamer Moghazy يقول...

اه..نسيت اقولك..
رغم ان كلام صاحبتك صح..الا اننا بنرفض نقتنع بالحقيقة دي..ودي مشاعر غصب عننا..!!

مجرد حلم صغنتوت يقول...

timo
نورتني بمرورك
معاك 100% في كلامك
احنا فعلا بنرفض الاقتناع بالحقيقة دي.... بس ده مش بمزاجنا... يمكن بمرور الوقت نقدر نقتنع بسرعة اكبر
يمكن...

إرسال تعليق

سيب بصمتك... سيب كلمتك...