27 نوفمبر، 2009

عيد غريب

بقالي كام يوم افتح المدونة علشان اكتب ومعرفش واقفلها وادخل انام
بس النهاردة قلت مينفعش بقى بكرة العيد والعيد فرحة ولازم اعيد على جيراني واصحابي

الاول كل سنة وانتو طيبين وبألف خير دايماً يا رب
ربنا يكرمنا ونكون على عرفات السنة الجاية ان شاء الله
 
ثانياً
انا بقول عيد غريب لأني مش حاساه اصلا خالص
يمكن لما اصلي العيد بكرة ان شاء الله احس بأي معالم للعيد ... مش عارفة بصراحة

هو البعد جفا زي ما بيقولو؟؟؟
كل شوية بيزيد كرهي للسفر.. مع اني بحب السفر جدا
بس السفر الترفيه غير السفر للشغل
اخواتي مسافرين للشغل... لما احس اني لما بشوفهم بعد سنة او اكتر اني مش حاسة بحاجة خالص... ده اسوء احساس ممكن احس بيه
حد فاهم حاجة؟؟
معرفش ليه حسيت ببعد فظيع مع انه واقف قدامي... يمكن بعد اكبر من اللي حسيت بيه وهو مسافر.. حاجة صعبة اوي
عارفة الرد التلقائي لأي حد على كلامي... سنة الحياة
يا جدعان عرفت والله
بس يمكن انا اللي مش عارفة اتأقلم مع سنة الحياة دي بسرعة... يمكن محتاجة آخد وقت شوية على ما اتقبلها ... يمكن فيه حاجات كتير اليومين دول المفروض اتقبلها علشان كده بتقبلهم ببطء... مش عارفة بصراحة
 
معلش على شوية الاكتئاب دول... قلت اطلعهم قبل العيد يمكن اعرف استمتع اليومين دول من غير اكتئاب
وادي خروف العيد
 

عيد بلا اكتئاب عليكم كلكم يا رب :)

11 طاروا معايا في الأحلام:

أميرة علي كوكب مهجور يقول...

كل سنه وانتي طيبه ياقمر وعيد سعيد عليكي يارب

الشعب لابد له من حكومه تشكمه يقول...

كل سنه وانتى طيبه ياجميله وكل متكبرى كل فرحتك بالعيد بتقل لييييييييييه مش عارفه.. يمكن لان زى مبتقولى مبيكونش فى مظاهر للعيد بيحسها غير الصغيرين بس مع انى لسه لحد دلوقتى بجيب لبس العيد بس برضه مش بحس بيه زى زمان...

على فكره اه البعد جفا:( للاسف:(

wessam kabil يقول...

كل سنة وانتي طيبة يادودو

عيد سعيد :-*

مسدس صغير يقول...

كل سنة وانتى طيبة
عيد سعيد عليكى
مشيها فرحة لحد تانى يوم العيد بس
هههههههه
ربنا يجعل ايامك كلها افراح

Darsh Basha يقول...

كل سنة وانتى طيبة يا دعاء
وان شاء الله عيد سعيد عليكى بأذن الله
بدون اى اكتئاب

مجرد حلم... صغنتوت يقول...

أميرة
وانتي طيبة يا جميل:)
يا رب عيد سعيد علينا كلنا

شيما
تقريبا كنا بنحس بيه زمان علشان مكناش بنفكر في حاجات تضايقنا
اقصى حاجة كانت بتضايقنا كانت اننا مجبناش الشيكولاته مثلا... مكنش فيه هموم ... كنا صافيين

كل سنة وانتي طيبة وبألف خير يا رب

وسام
وانتي طيبة يا قلبي
يا رب يبقى عيد سعيد عليكي

مسدس صغير
حاضر يا صلاح هحاول امشيها فرحة لتاني يوم وربنا يسهل بعد كده بقى هنعمل ايه :)
كل سنة وانت طيب

مصطفى
كل سنة وانت طيب ويا رب يبقى عيد بدون اكتئاب علينا كلنا :)

خواطر شابة يقول...

تمنياتي لك بعيد سعيد ينعاد عليك بكل خير ان شاء الله
معك حق فرحة العيد في الصغر كان لها طعم أخر نفتقده كلما تقدم بنا السن لكن من رزقه الله الذرية يستعيد معها فرحة العيد لانهم برجعونه لطفولته حيث يفرح لفرحهم
بالنسبة لموضوع ان البعد جفاء فمعك حق لانه عندما نتعود على الغياب شئ ما يموت فينا كل واحد تصبح له حياة مختلفة اهتمامات مختلفة معارف جدد علاقات اخرى يكتسب عادات أخرى فعند اللقاء كلانا لايكون نفس الشخص الذي كان
مرة أخرى عيد سعيد ونصيحة أرمي الكأبة وراء ظهرك واستمتعي بحياتك ولاتضيعيها
تحياتي

رحــــيـل يقول...

شوفى يا دودو
انا حاسه قوى موضوع البعد ده للاسف مع الوقت حاجات كتير بتموت احساسك بالدفا والود والصحبة واللمة
بتلاقى نفسك قدام حد غريب رغم انه كان اقرب ليكى من نفسك البعد جفا فعلا

:)) ورغم النكد كل سنة وانتى طيبة

sookra يقول...

بصى بقى يادودو
النهارده طبعا العيد
وانا برده موش حاسه بفرح ولاحاجه
عادى زى ماانا
العادى بتاع
اكتئاب فى اكتئاب
اوف عليا يخرب بيت كدا
سيبك لبعد جفا وجفا
كل سنه وانتى طيبه ويارب ماتحسى باى اكتئاب

حلم بيعافر يقول...

كل سنة وانتن طيبة ومن غير اكتئاب

افرحى الفرحة حلوة وتستاهل

مجرد حلم... صغنتوت يقول...

خواطر شابة
الشيء اللي بيموت ده للاسف مش بيرجع تاني
بحاول ارمي الكآبة ورا ضهري واستمتع بالحياة اهو... ربنا يسهل يا رب
وكل سنة وانتي طيبة :)

رحيل
ورغم النكد كل سنة وانتي بألف خير
عارفة اني قلبت الموضوع كآبة بس مش بمزاجي والله ... معلش

سكرة
يا رب كلنا منحسش باكتئاب
نعمل ايه بس يا ساسو؟؟
ممكن نوفره يومين بس بعد العيد كده :)

حلم بيعافر
بحاول والله... بس تحس ان جزء الحزن ده بيطلع على طول في الاوقات اللي المفروض الواحد فيها ميزعلش من اي سبب.. هي بتيجي كده
كل سنة وانت طيب

إرسال تعليق

سيب بصمتك... سيب كلمتك...